அநேகமாய்
இந்த வாரத்திற்குள் முடிந்துவிடும்
ஜோசியர் போல
நாள் குறித்துச்சென்றார்
மருத்துவர்
அடுத்த வாரம் விடுமுறை
தேவைப்படலாம்
அலுவலகத்தில்
முன்னெச்சரிக்கையாய்
சொல்லி வைத்தான்
மகன்
அத்தை மகள் நிச்சயம் வருவாள்
ஆசையாய் மீசை நறுக்கினான்
பேரன்
சீர் என்ன செய்வீர்கள்
பிறந்த வீட்டாரிடம்
பேசிக்கொண்டிருந்தாள்
மருமகள்
பள்ளிக்கூடத்திற்கு ஒரு வாரமேனும்
விடுமுறை போடலாம்
கொள்ளுப்பேரன்கள் திட்டம்
தீட்டினர்
அடுத்த மாதம் யார் வீட்டில்
சாப்பிடுவது
கவலையாய் யோசித்தாள்
மனைவி
அம்மாவின் நகைகள்
யாருக்கு சேரும்
யாரிடமோ விசாரிக்கிறாள்
மகள்
நலம் விசாரிப்பது போல்
வந்து விட்டு
தன் இருப்பை காட்டி விட்டு
சென்றான்
மேளக்காரன்
இதை எதுவும் அறியாமல்
கட்டிலில்
படுத்திருந்தது
அந்த பிணம்..
No comments:
Post a Comment